Parveen Shakir Poetry

Parveen Shakir 1952-1994 Poetries : 108

Parveen Shakir was a legendary female poet who started her professional career in her childhood. Her first book was “Khushbu”. Then she came up with other books named Sad-Barg, Khud’kalaami, and Inkar. Sadly, she died in a car accident while she was going to work in 1994.

Ku-ba-ku phail gayi baat shanasayi ki

Ku-ba-ku phail gai bat shanasai ki,
Us ne khushbu ki tarah meri pazirayi ki,

Kaise kah dun k mujhe chor diya hai us ne,
Bat to sach hai magar bat hai ruswayi ki,

Wo kahin bhi gaya lauta to mere pas aya,
Bas yahi bat hai achi mere harjai ki,

Tera pahlu tere dil ki tarah abad rahe,
Tujh pe guzre na qayamat shab-e-tanhai ki,

Us ne jalti hui peshani pe jo hath rakha,
Rooh tak aa gayi tasir masihayi ki..

Main sach kahun gi magar phir bhi haar jaun gi..

Main sach kahun gi magar phir bhi haar jaun gi,
Woh jhoot bole ga aur la’jawab kar de ga..

Iss baar jo eendhan ke liye katt ke gira hai..

Iss baar jo eendhan* ke liye katt ke gira hai,
Chirriyon ko barra pyaar tha uss boorrhe shajar se..

(eendhan:fuel)

Mere lafzon se nikal jaye assar..

Mere lafzon se nikal jaye assar,
Koi khawhish jo tere baad karoon.

Woh to khushbuu hai hawaaon mein bikhar jaye ga..

Woh to khushbuu hai hawaaon mein bikhar jaye ga,
Masla phool ka hai, phool kidar jaaye ga..

Sab rutain aakar chali jati hain..

Sab rutain aakar chali jati hain,
Mausam-e-gham bhi to hijrat karta..

(rutain;moments)

Sundar, komal sapnon ki baraat guzar gayi jaana..

Sundar, komal sapnon ki baraat guzar gayi jaana,
Dhoop ankhon tak aa pohanchi hai, raat guzar gayi jana,

Bhanwar samay tak jis ne humain baaham uljhaaye rakha,
Woh albeli resham aesi baat guzar gayi jaana,

Sadaa ki dekhi raat humain is baar mili to chupkay se,
Khaali hath pe rakh ke kya soghaat guzar gayi jaana,

Kis kompal ki aas mein ab tak wese hi sarsabz ho tum,
Ab to dhoop ka mausam hai, barsaat guzar gayi jaana..

Darwaza jo khola to nazar aaye kharre woh..

Darwaza jo khola to nazar aaye kharre woh,
Hairat hai mujhe, aaj kidhar bhool parre woh,

Bhoola nahin dil, hijr ke lamhaar karray woh,
Raatein to barri theen hi, Magar din bhi barre woh,

Kyun jaan pe ban aayi hai bigrra hai agar woh,
Uss ki to yeh aadat ke hawaaon se larre woh,

Alfaaz they us ke ke bahaaron ke peyamaat,
Khushbuu si barasney lagi, yoon phool jharre woh,

Har shakhs mujhe tujhse juda karne ka hwa’haan,
Sun paaye agar aik to dass ja ke jarre woh,

Bachey ki tarah chaand ko choonay ki tammana,
Dil ko koi shay dede to kya kya na array woh,

Tufaan hai to kya gham, mujhe awaz to di jiye,
Kya bhool gaye aap mere kachay gharre woh..

Perveen Shakir

Tamaam raat mere ghar ka aik dar khulaa raha..

Tamaam raat mere ghar ka aik dar khulaa raha,
Mein raah dekhti rahi woh raasta badal geya..

Rail ki seetti mein kese hijr ki tamheed thi..

Rail ki seetti mein kese hijr ki tamheed thi,
Us ko rukhsat karke ghar lotay to andaaza hua..

Tera pehlu, tere dil ki tarah abaad rahe..

Tera pehlu, tere dil ki tarah abaad rahe,
Tujh pe guzrey na qayamat shab-e-tanhai ki..

Kon chahey ga tumhe meri tarah…

Kon chahey ga tumhe meri tarah,
Ab kisi se na mohabbat karna..

Bohat se log they mehmaan mere ghar lekin

Bohat se log they mehmaan mere ghar lekin,
Wo janta tha k hey ehtamam kis k liye..

Marney se bhi pehle mar gaye they..

Marney se bhi pehle mar gaye they,
Jeeney se kuch aese dar gaye they,

Rastey mein jahan talak diye they,
Saarey mere hamsafar gaye they,

Aankhain abhi khul nahin saki thi’n,
Aur khawb mere bikhar gaye they,

Jab tak na khila tha us ka waada,
Mausam mere be’samar gaye they,

Ab tak wohhi nasha e paziraayi*,
Kya jaaniye hum kidhar gaye they..

(paziraayi;appreciation)

Rasta hi neya hai, na main anjaan bohat hoon..

Rasta hi neya hai, na main anjaan bohat hoon,
Phir kuye’malaamat mein hoon, nadaan bohat hoon,

Ik umar jisey khawab ki manind hi dekha,
Chooney ko mila hai to pareshaan bohat hoon,

Mujh mein kabhi aahat ki tarah se koi aye,
Ik band gali ki tarah sunsaan bohat hoon,

Uljhen ke keyi baar abhi lafz se mafhoom,
Saada hai bohat woh, na main asaan bohat hoon..

Badal dena hai rasta ya kahin par beth jana hai..

Badal dena hai rasta ya kahin par beth jana hai,
Ke thaktaa ja raha hai humsafar ahistaa ahistaa..

Ab Kaisi Pardah-Daari , Khabar Aam Ho Chuki

Ab Kaisi Pardah-Daari , Khabar Aam Ho Chuki
Maa Ki Rida Tou, Din Howe, Neelaam Ho Chuki

Ab Aasmaa.n Se Chadar-e Shab Aaye Bhi Tou Kiya
Be-Chadari Zameen Pe iLzaam Ho Chuki

Ujrey Howe Diyaar Pe Phir Kiun Nigah Hai
Is Kasht Per Tou Barish-e-Ikraam Ho Chuki

Sooraj Bhi Os Ko Dhoond Ke Wapas Chala Gaya
Ab Ham Bhi Ghar Ko Lout Chalain Shaam Ho Chuki

Shimley Sambhaaltey Hee Rahay Maslehat Pasand
Hona Tha Jis Ko Pyaar Main Bad-Naam Ho Chuki

Aankhain Hain Aur Subha Talak Tera Intezaar
Mishal Bad’dast Raat Terey Naam Ho Chuki

Koh-e-Nida Se Bhi Sukhan Utrey Agar, Tou Kiya
Na-Sameoo.n Main Hurmat-e-iLhaam Ho Chuki

Wo Aks-e-Mauja-e-Gul Tha, Chaman Chaman Mein Raha

Wo Aks-e-Mauja-e-Gul Tha, Chaman Chaman Mein Raha
Wo Rang Rang Mein Utraa, Kiran Kiran Mein Raha

Wo Naam Haasil-e-Fun Ho Ke Mere Fun Mein Raha
Ke Rooh Ban Ke Meri Soch Ke Badan Mein Raha

Sakoon-e-Dil Ke Lye Mein Kahan Kahan Na Gayi
Magar Ye Dil, Ke Sadaa Oski Anjuman Mein Raha

Wo Sheher Waalon Ke Aagay Kaheen Mohazzib Tha
Wo Ek Shakhs Jo Sheheron Se Door Ban Mein Raha

Charaagh Bujhtay Rahay Aur Khwaab Jaltay Rahay
Ajeeb Tarz Ka Mausam Mere Watan Mein Raha

Ab Bhala Chorh Ke Ghar Kia Kartay

Ab Bhala Chorh Ke Ghar Kia Kartay
Shaam Ke Waqt Safar Kia Kartay

Teri Masroofiatain Jaantay Hain
Apne Aanay Ki Khabar Kia Kartay

Jab Sitaaray Hee Nahi Mil Paaye
Le Ke Ham Shams-o-Qamar Kia Kartay

Wo Musaafir Hee Khuli Dhoop Ka Tha
Saaye Phaila Ke Shajar Kia Kartay

Khaak Hee Awwal-o-Aakhir Thehri
Kar Ke Zarray Ko Gohar Kia Kartay

Raaye Phele Se Bana Li TU Ne
Dil Mein Ab Ham Tere Ghar Kia Kartay

Ishq Ne Saaray Saleeqay Bakhshay
Husn Se Kasb-e-Hunar Kia Kartay

.Aankhon mein sawaal they hazaaron..

Ik umar ke baad us ko dekha,
Aankhon mein sawaal they hazaaron,
Honton pe magar wohi tabasum,
Chehrey pe likhi huyi udaasi,
Lehjey mein magar balaa ka thehrao,
Awaaz main goonjti judai,
Baanhen thi magar wisaal-e-samaan,

Simtti huyi baazuyon mein,
Taa’der mein sochti rahi thi,
Kis abr-e-gurez paa ki tarah,
Main kis shajar se katt gayi thi,
Kis chaaon ko tark kar diya tha,

Main us ke galey lagi huyi thi,
Woh ponchh raha tha mere aansu,
Lekin barri dair ho chuki thi..

Ab aur jeeney ki surat nazar nahin ati..

Ab aur jeeney ki surat nazar nahin ati,
Kisi tarah bhi achi khabar nazar nahin ati,

Ussi ke aas main hai dil ka hujraa tareek,
Woh roshni jo kabhi mere ghar mein nahin ati,

Woh meherbaan hai to mehraab-o-baam tak na rahe,
Yeh dhoop kyon pas-ey dar o deewar nahin ati,

Hayaat mein ab koi aesa morr nahin,
Ke jis ke baad teri rahguzar nazar nahin ati,

Qabooliyat ki hai gharri to us ko maang hi loon,
Ke yeh gharri kabhi baar-e-dagar nahin ati,

Saraaye khaana dunyiyaa main shaam hoti hai,
Musaafiron ko naveed-e-safar nazar nahin ati..

Khuli aankhon mein sapna jhaankta hai..

Khuli aankhon mein sapna jhaankta hai,
Woh soya hai ke kuch kuch jaagta hai,

Tere chahat ke bheegey junglon mein,
Mera tan man mor ban kar nachta hai,

Mujhe har kefiyat mein kyon na samjhey,
Woh mere sab hawaaley jaanta hai,

Main uss ki dastrass main hoon magar woh,
Mujhe meri razaa se mangta hai,

Kissi ke dheyaan main dooba hua dil,
Bahaaney se mujhe bhi taalta hai,

Sarrak ko chorr kar chalna parega,
Ke mere ghar ka kacchaa rasta hai..

Wo Merey Pao.n Ko Choney Jhuka Tha Jis Lamhey

Jagaa Sakey Na Terey Lub, Lakeer Aisi Thi
Humarey Bakht Ki Raikha Bhi Meer Aisi Thi

Ye Haath Chomey Gai, Phir Bhi Be-Gulaab Rahey
Jo Rutt Bhi Aai Khizaa.n K Safeer Aisi Thi

Wo Merey Pao.n Ko Choney Jhuka Tha Jis Lamhey
Jo Mangta Usey Deti Ameer Aisi Thi

Shahadatain Merey Huq Main Tamam Jaati Thee.n
Magar Khamosh They Munsif, Nazeer Aisi Thi

Kutar K Jaal Bhi Sayyad Ki Raza Ke Baghair
Tamaam Um’r Na Urti Aseer Aisi Thi

Phir Us Ke Baad Na Dekhey Visaal Ke Mausam
Judaiyo.n Ki Ghari Chashm Geer Aisi Thi

Bas Ik Nigah Mujhe Dekhta, Chala Jata
Us Aadmi Ki Mohabbat Faqeer Aisi thi

Rida K Saath Luterey Ko Zaad-e Raah Diya
Teri Firagh Dili Merey Veer Aisi Thi

Kabhi Na Chahney Walo.n Ka Khoo.n Baha Manga
Nigaar-e-Sheher-e-Sukhan Be-Zameer Aisi Thi

Koi aahat na koi chaap na koi awaaz..

Koi aahat na koi chaap na koi awaaz,
Dil ki galiyan meri sunsaan hain aye koi..

Woh aik rishta benaam bhi nahin lekin..

Woh aik rishta benaam bhi nahin lekin,
Main ab bhi us ke isharon pe sar jhukaon gi..

Doobi hain meri ungliyaan apne lahuu main..

Doobi hain meri ungliyaan khud apne lahuu main,
Yeh kaanch ke tukrron ko uthaney ki sazaa hai..

Bachpaney ki neend ki to ab khawb ho gayi

Woh bachpaney ki neend ki to ab khawb ho gayi,
Kya umar thi ke raat huyi aur so gaye..

Khushi ki baat hai ya dukh ka manzar..

Khushi ki baat hai ya dukh ka manzar dekh sakti hoon,
Teri awaaz ka chehra main chuu kar dekh sakti hoon,

Abhi tere labon pe zikar fasl-e-gul nahin aya,
Magar ik phool khilte apne andar dekh sakti hoon,

Kinaara dhoondne ki chaah tak mujh mein nahin hogi,
Main apne gird aik aesa samandar dekh sakti hoon,

Vasaal-o-hijar apne yaksaa’n* hain, woh manzar hai chahat mein,
Main aankhain band kar ke tujh ko aksar dekh sakti hoon,

Abhi tere siwaa duniyaa bhi hai maujood is dil main,
Main khud ko kiss tarah tere baraabar dekh sakti hoon..

(yaksaa’n;similar)

Ik shakhss ko sochti rahi main..

Ik shakhss ko sochti rahi main,
Phir aayina dekhne lagi main,

Us ki tarah apna naam le ker,
Khud ko bhi lagi neyi neyi main,

Tu mere bina reh na saka to,
Kab tere baghair jee saki main,

Aati rahe ab bhi kahin se awaz,
Ab to tere pass agayi main,

Daaman tha tera ke mera maatha,
Jo daagh bhi they mittaa chuki main..

Gungunatey huye lamhon main usey..

Gungunatey huye lamhon main usey,
Dheyaan mera kabhi aaya ke nahin..